Af eggvopnum

Sverð. Er til fegurra orð á íslenskri tungu? Eflaust.

Að bregða sverði á dramatískan hátt er eitthvað sem ég væri til í að kunna. Ekkert heillar dömur og málleysingja eins mikið og sprækur vígamaður sem hendir og snýr sverði af heift og blóðugum þokka einsog svanur í riddaramynd. En hér, nokkrir þankar um sverð og skyld málefni:

Hafið þér prófað að setja sverð aftur í slíðrið? Það er ekkert smá erfitt. Maður stendur einsog óviti að miða sverðinu oní dæmið. Alls ekki eins þokkafullur og hinn möllettaði Kevin Costner í hlutverki Hróa Hattar. Ég mundi bara vera með sverðið í hagkaupspoka.

Hvað ætli sé besta sverðið? Víkingarnir voru með svona risastór sverð af stærð og þykkt á við stöðvunarskyldumerki og Arabarnir nota stór bjúgsverð til að búta heiðingja í sundur. Hins vegar voru skytturnar þrjár með þvengmjó dömusverð og Zorró stakk fólk með einhverju sem leit út einsog ósoðið spagettí. Ég mundi halda að víkingar og arabar (í sögulegu samstarfi) myndu rústa Zorró og Skyttunum í sverðaslag. Litlu mjóu sverðin þeirra myndu bara brotna á stóru sverðunum. Erþaggi? Svo eru Zorró og Skytturnar þrjár ekki til í alvörunni.

Mundi ekki gæjinn með lengra sverðið vinna í skylmingum?

Ég hef öruggar heimildir fyrir því að þú deyrð ekki af því að vera stunginn í magann. Eða hvar sem er. Þér blæðir eflaust mikið og það er voða sárt. Þú gæti jafnvel dáið innan örfárra klukkustunda ef þú kemst ekki undir læknishendur. En málið er bara að ef þú ert ekki afhöfðaður þá deyrðu ekki samstundis af einu stungusári. Engu að síður þurfa Braveheart og félagar ekki nema að draga sverð eftir síðu bretahers og gæjinn steindrepst á svipstundu. Sverð eru gríðarlega of-máttug í bíómyndum. Eflaust mökuð í eitri.