<body><script type="text/javascript"> function setAttributeOnload(object, attribute, val) { if(window.addEventListener) { window.addEventListener('load', function(){ object[attribute] = val; }, false); } else { window.attachEvent('onload', function(){ object[attribute] = val; }); } } </script> <div id="navbar-iframe-container"></div> <script type="text/javascript" src="https://apis.google.com/js/platform.js"></script> <script type="text/javascript"> gapi.load("gapi.iframes:gapi.iframes.style.bubble", function() { if (gapi.iframes && gapi.iframes.getContext) { gapi.iframes.getContext().openChild({ url: 'https://www.blogger.com/navbar.g?targetBlogID\x3d11318911\x26blogName\x3d\x27tis+the+ballad+of+Bob\x26publishMode\x3dPUBLISH_MODE_BLOGSPOT\x26navbarType\x3dSILVER\x26layoutType\x3dCLASSIC\x26searchRoot\x3dhttps://balladofbob.blogspot.com/search\x26blogLocale\x3dis_IS\x26v\x3d2\x26homepageUrl\x3dhttp://balladofbob.blogspot.com/\x26vt\x3d-2569463983589778356', where: document.getElementById("navbar-iframe-container"), id: "navbar-iframe" }); } }); </script>





sunnudagur, apríl 30, 2006

Jæja verkalýður! Bullets for you!

> Er ekki málið að fá sér einn Nelson í Pepsi?

> Það er ekki oft sem ég syng og dansa á áfengisknæpum, ég er meira í sitja-dissa-og-tauta liðinu en ég var í blússandi sveiflu í gær aldrei þessu vant. Guð blessi Lazerinn.

> Jæja, ég lét drauminn rætast og stofnaði loksins hljómsveit

> Ég stefni á að verða svona álitsgjafi í heimildarmynd, það væri æði.

> Ef það bregst, væri ég einnig til í að taka þátt í commentary á einhverjum DVD. Er ég einn um að finnast það skemmtilegasta aukaefnið?

> Ég er orðinn svo mikill piparsveinn að ég er að spá í að fá mér leikjatölvu. Stoppið mig.

föstudagur, apríl 28, 2006

Föstudagslagarinn V

fimmtudagur, apríl 27, 2006

Hey mamma, það er komið vor!

Ég hef fimm hluti að segja.

I
Það er gaman að lesa blogg. En það er ekki gaman að lesa svona bullshit-færslur:

Sorry hvað ég hef bloggað lítið undanfarið. Ég er bara búinn að vera rosalega upptekinn/veikur/haldið föngnum í Abu Grahib. Svo hef ég hvort eð er ekkert skemmtilegt að skrifa um! Ég lofa að reyna að finna eitthvað sniðugt til að segja ykkur frá þegar ég hef meiri tíma. Bless á meðan!

Ef þú hefur ekki tíma/nennir ekki að skrifa færslu, þá skaltu ekki skrifa færslu um ekkert og afskaka að þú sért að skrifa færslu um ekkert. Ég sé alveg að þú hefur ekki bloggað lengi, þú þarft ekki að skrifa það niður fyrir mig. Næst skal ég bara bíða kurteis þangað til það kemur ný færsla. Ég skal bara leysa krossgátu eða leira handa þér öskubakka á meðan ég bíð.

II
Það eru semsagt fjögur guðspjöll í biblíunni (Hafsteinsguðspjall, Eiríksguðspjall, Díönuguðspjall og Eiríksguðspjall II: Unrated!) En vissuð þið að þetta eru bara þau fjögur sem voru valin í bókina góðu? Það voru til allt að þrjátíu guðspjöll, og eitt þeirra bar heitið Júdasarguðspjall! Ég var að horfa á heimildarmynd þar sem einhverjir rykugir menn í brúnum vestum og yfirvaraskeggjum fundu þetta merka rit í einhverjum skókassa eða eitthvað. Í Júdasarguðspjalli má lesa um það sem Júdas var að gera á síðustu dögum Jesúsar. Júdas er þarna málaður í allt öðru ljósi en við eigum að venjast. Hann reddaði postulunum deitum á bakvið tjöldin, hann vann hlutavinnu á leikskóla og hann bakaði alltaf afmælistertuna þegar einhver lærisveinninn átti afmæli (Júdasarterta með stjörnuljósum).

III
Er einhver að horfa á 17. seríu af Simpsons? Ég var löngu búinn að gefa drauminn um að þættirnir gætu náð fyrri hæðum upp á bátinn, en viti menn! Þessi sería er sú besta síðan sú sjöunda. Þið sem eruð að horfa, segið amen. Þeim sem eru ekki að horfa sendi ég bara stuðkveðjur.

IV

Sjáiði nýja (gamla), fína (snjáða) sófann minn! Hver vill sitja í honum með mér og troða muldu poppi á milli sessanna?

V
Það fer að koma helgi ekki satt? Ég veit ég gleymdi að setja inn föstudagslagara síðast (tók einhver eftir því?) en ég var á milli heims og helju af hori og beinverkjum. Ég vil gera einsog Sam Beckett í Quantum Leap og laga hluti í fortíðinni. Hérna er því nýjasta lagið með The Rapture.

The Rapture- 'W.A.Y.U.H.' mp3

Enginn gerir fullkomnari dansiballatónlist en þetta band og sérstaklega eru þeir lunknir að gera skemmtilega slogan/chant texta. Í 'W.A.Y.U.H.' yrkja þeir þennan sannleiksmola:

People don't dance no more
They just stand there like this
They cross their arms and stare you down
and drink and moan and diss



Góðar stundir.

mánudagur, apríl 24, 2006

Mánudagslag #16

laugardagur, apríl 22, 2006

Berrass

Hinn meðalfrægi gimmikk-ljósmyndari Spencer Tunick tekur 'nektarlandslagsmyndir' af sýniþörfu fólki. Þessar myndatökur hans vekja skiljanlega athygli, en sérstaklega virðast fréttahaukar mbl.is hafa mikinn áhuga á illa vöxnum útlendingum á evuklæðunum eins og sjá má hér, hér, hér , hér , hér , hér , hér og hér

Hann kom víst hingað til lands um daginn til að vera viðstaddur sýningu á verkum sínum og sagði í fréttatilkynningu að íslendingum 'gefst kostur á að taka þátt'. Hvaða aula datt það í hug? Hvílík fásinna. Það hefur verið ansi hljóðlátt á opnuninni þegar það var stungið upp á að allir færu úr fötunum. Íslendingar þora ekki að klappa fyrir liðinu sínu á landsleikjum, hvað þá að draga fram samanskroppið rúsínutippið fyrir framan myndavél.

Miðlungs heimalningur

Það eru allir að linka í þetta þannig að ég hlýt að mega það líka.
Average Homeboy

fimmtudagur, apríl 20, 2006

COP ON THE EDGE PART 5:
THE STOOLIE.



Part 1: Morning
Part 2: The Ride
Part 3: Enter the Villain
Part 4: The Precinct

Eftir dramatískar nærmyndir af hjólkoppum og sólgleraugum legg ég bílnum við gangstéttarbrún. Við erum komnir á áfangastað: nafnlaus gata í niðurnýddum hluta Los Angeles. Sólin skín og þægileg og rök golan strýkur mér um bringuhárin sem standa út úr fleginni skyrtunni. Við Doggett staðnæmumst og höllum okkur að bílnum um stundarkorn og virðum senunni fyrir okkur.

Gatan er troðin af fólki á iði. Dansvæn hip-hop tónlist berst úr gríðarstórum gettóblaster sem nokkrir svartir unglingar eru að dansa í kringum. Börnin í hverfinu hafa skrúfað frá brunahana og eru nú í skríkjandi steypibaði. Maður nokkur stendur við grill og steikir pulsur í svangann múginn. Ung latínustúlka í syndsamlega litlum sundbol gengur hjá og menn með hvíta stráhatta bíta í hnúana þegar þeir sjá hana. Krakkar að sippa með tveimur böndum, ungir menn að gefa high-five og strákar í teningaspili við vegg. Svört amma með krullur í hárinu situr svo í glugganum sínum og horfir yfir mannskapinn fúl á svip.

Við erum í þessu sjarmerandi litríka gettói til að komast að því hvert orðið á götunni sé. ég er með mann á launaskrá sem hefur reynst mér vel í þessum málum. Hann heldur sig oftast hér. Ég geng af stað en gungan hann Doggett er enn við bílinn. "Ahem, Reed!" hóstar hann og nikkar í áttina að stöðumælinum sem ég hef ekki borgað í. Ég ranghvolfi augunum af aulahrolli og horfi ögrandi í augu hans á meðan ég set pappírspoka yfir stöðumælinn. "Vandamáli eytt" segi ég og kveiki mér í fjórðu sígarettunni síðan ég kom hingað. Ég er gallharður.

Við örkum niður götuna á meðan tónlistin magnast. Doggett er lágvaxinn stauli í brúnum jakkafötum og með orðabókar-lögguklippingu. Hann væri með yfirvaraskegg ef hann hefði nógu karlmannlegan skeggvöxt. Ég er með axlarsítt hár, í brúnum leðurjakka og í fyrrnefndri fleginni, köflóttri skyrtu. Lögregluskjöldur dinglar í keðju um hálsinn á mér. Skyndilega rekst ég á slefberann minn: Stretch. Hann kemur til mín. "Jó, Jack my maaaan! Yo still got tha Swagga like my man Mick Jagga?" skríkir hann og heilsar mér. Ég kann allt þetta flókna high-five rugl sem blökkumenn gera. "Sæll, Stretch minn. Hvað syngur í þér?" Ég er með allt slangrið á hreinu líka. Stretch verður litið á Doggett og hvíslar að mér. "Jó, Reed, þarf ekki að skipta um prikið í rassinum á honum þessum? He be trippin like my man Scottie Pippen!" "-Fástu ekki um hann" segi ég. "Fáum okkur göngutúr".

Stretch er ungur og horaður blökkumaður í hvítum jogginggalla og með gullkeðju um hálsinn. Þrátt fyrir að hann sé augljóslega að umgangast lögregluþjóna í þessu hættulega hverfi ber hann sig ótrúlega vel. Hann þekkir alla og gefur öllum five. Af Stretch að dæma skulda allir honum 20 dollara og voru klikkaðir í partýinu í gær. "Hvað getur þú sagt mér um aftökuna á Salabasar í morgun" spyr ég og mata Stretch á fimm dollara seðlum. "Jó, Reed, þetta var slátrun, Jack the Ripper með vélbyssur. Þeir áttu ekki séns. Þetta var einsog rán í blindrastafsverslun my man: Nobody saw nuthin!" Engin vitni. Myrtir menn segja engar sögur. En ég veit hver þetta var... Zevallos!

Stretch staðnæmist og lækkar róminn. "En dig this brotha man - Ég heyrði um risastóra sendingu af partý-dufti sem er á leiðinni hingað to-night! It's huge maaan. Huuuuge." Hann blikkar mig og hirðir restina af seðlunum mínum. Stretch heldur af stað og hverfur high-fiveandi inní mannmergðina. Þetta kemur allt heim og saman. Zevallos ætlar sér að taka yfir markaðinn og lýsa yfir stríði gegn öllum þeim sem standa í vegi hans. Þetta gæti orðið blóðbað.

Ég virði Doggett fyrir mér. Þetta gæti orðið áhugavert. "Koddu kall" segi ég og klappa á lærið á mér á meðan Doggett eltir mig aftur að bílnum. Það er sekt á rúðunni. Doggett heldur á henni kaldhæðinn á svip. "Ekkert mál" segi ég og sest inn í bíl. Ég opna hanskahólfið og hundruðir af sektum hrynja í gólfið. "Settu hana með hinum!"

Sumarið er tíminn þegar Bubbi fer á stjá

Hvernig er hægt að vera með kvefpest í meira en tvær vikur? Ég skil þetta ekki.

Er að vinna að nýjum hluta framhaldssögu um lögregluþjón sem fer sínar eigin leiðir. Watch this spot.

En þangað til, VAFR!

Ég las einu sinni stutta skrípasögu eftir Dan Clowes (of 'Ghost World' fame) sem hét "Art School Confidential". Þar snéri Dan spéspegli sínum að hinum litríku karakterum og uppákomum sem listaskólanemar ættu að kannast við. Þar sem ég hef numið við tvo listaskóla fannst mér afar gaman að þessari sögu. Fullkomið dæmi um "Fyndið því það er satt". Jæja, nú er búið að gera bíómynd. Treiler hér.

Þú hefur valdið David Bowie mjög miklum vonbrigðum.

Loksins er komið tónlistarmyndbandablogg.

Var ég búinn að linka í þetta? Man það ekki. En fyndið er það.

þriðjudagur, apríl 18, 2006

mánudagur, apríl 17, 2006

Mánudagslag #15

Túpan þín

Hver man ekki eftir þessum ódauðlega slagara úr the Young Ones?


sunnudagur, apríl 16, 2006

"Rangers lead the way"

Wá, það eru bara liðnar þrjár mínútur af Con Air og ég er orðlaus af viðurstyggð.

Ég elska Jerry Bruckheimer.

laugardagur, apríl 15, 2006

...Eftir glas á gógóbarnum geturðu hvað sem er!

Fyrir þá sem hafa leitt hugann að því hvað varð um eina af okkar fremri diskógrúppum...













Jamm, þarna er vafalaust vínrautt flauelsteppi á veggjum, KC and the Sunshine Band á fónum og þreknir menn í leðurjökkum í dyrum. Ég veit að ég mun leita þangað fyrir allar mínar lýsingarþarfir héðan í frá.

föstudagur, apríl 14, 2006

Föstudagslagarinn IV

þriðjudagur, apríl 11, 2006

Apache Indian, Doop, Richard Simmons, Joey Buttafuoco, Nancy Kerrigan, Pláhnetan og Rósenberg kjallarinn

Þeir sem þekkja mig í daglegu lífi ættu að vita að ég er svoldill sökker fyrir nostalgíunni. Ég hef löngum hampað tíunda áratuginum og bíð þess spenntur að það verður tilkynnt á forsíðunni á (nýlega endurstofnaðri) Gulu Pressunni að "NÆNTÍS ER NÝJA EITÍS!!"

Ef einhver lumar í kompunni sinni á gulum, órans, rauðum eða sægrænum Jees gallabuxum af stærðinni 34, þá er ég með veskið á lofti!

Gildir einu. Það hefur greinilega einhver verið að hlusta á óskir mínar sem ég hef hvíslað í goluna, því það er komið Trivial Pursuit 90's edition! Allir heim til Bjölla að spila! Y2K, Forrest Gump, Spandex, tónlistarmyndbönd með sepia-filter, tekknó-ormagöng, Claire Danes, Babylon Zoo. Eruð þið með fleiri nostalgíu stikkorð?

Heyrðu, svo prófa ég svona online preview á leiknum og þá kemur þessi tilkynning upp...
















Svolítið undarlega orðað en skilaboðin eru skýr: Þeir sem spila Trivjal eru að leika sér að dauðanum!

mánudagur, apríl 10, 2006

Mánudagslag #14

föstudagur, apríl 07, 2006

Hlutir sem benda til að þú sért hörkutól























#87:
Þú ert bringan á Alec Baldwin.

Föstudagslagarinn III

fimmtudagur, apríl 06, 2006

Brumm Brumm Búmmtissj

Hér er kenning: Það er bein fylgni á milli desíbelfjölda hljómflutningstækja í bifreiðum og gæða tónlistarinnar sem er spiluð í þeim. Því lélegri sem tónlistarsmekkurinn er, því betri eru græjurnar í bílnum. Eeh, gömul tugga. En mín skoðun er sú að þeir sem keyra niður laugarveginn með græjurnar í botni og rúðurnar skrúfaðar niður eru plötusnúðar götunnar. Þeir eyða föstudagskvöldum í að herða alla bolta á bílnum sínum (bassinn í kraftmiklum tækjum láta bíla gliðna í sundur með tímanum) og að búa til mixteip með nýjustu og bestu tónlistinni (að þeirra mati). Svo er rúðunum slakað niður og transinn (eða Sálin) látinn gossa. Svo er það rúnturinn þangað til einhver fleygir sér þvert yfir húddið og spyr hvaða snilld hann er að spila (eða biður um óskalag) og þá er takmarkinu náð (það hefur aldrei gerst). Bifreiðar með ógurlegum bassaboksum eru síðasti griðarstaður misheppnaðra plötusnúða.

Minn bíll verður með standard græjum sem fylgdu með honum og eight-track spólu með 'The Best of the Bellamy Brothers'.

En að öðru. Ég rakst á plakat með þeim fréttum að Cosmo Vitelli muni spila á Ólíver (af öllum stöðum) á laugardaginn næstkomandi. Frítt inn, allir að mæta.

Hér er lag með honum (hverjum hefði dottið í hug að dreggjum 90's danstónlistar væri hægt að breyta í svona skemmtilegt lag?):
Cosmo Vitelli - 'I Like to Move it' (Tekel remix) mp3

Bara Lovísa












Innan um allt harðlífis kokk-rokkið og tilgerðarlegu glamúrtittlingaböndin er hressandi þegar einlægt, lágstemmt og hæfileikaríkt tónlistarfólk skýtur upp kollinum. Lovísa Elísabet Sigrúnardóttir kemur fram undir nafninu Lay Low og hefur verið dugleg að spila að undanförnu. Þrátt fyrir að hún sé að stíga sín fyrstu skref sem sólólistamaður hefur hún verið að gera það gott í hinum ýmsu verkefnum, þá einna helst Benny Crespo's Gang.

Lay Low er með gamla sál og flytur tregafullt en vongott blús/kántrý og hrífur alla með sem vilja heyra. Hana má sjá í Smekkleysubúðinni á morgun, föstudag kl. 17:00 og á Grand Rokk þann 13. þessa mánaðar. Allir að kíkja í volæðið.

Hér eru nokkur lög í vinnslu:
Lay Low - 'Boy oh Boy' mp3
Lay Low - 'Bye Babe' mp3
Lay Low - 'Mojo Love' mp3

Lovísa á Myspace

þriðjudagur, apríl 04, 2006

Hóst, plúrg, öhöhh!

Ég er kominn með spænsku veikina, blýeitrun, bólu- og einkyrningssótt, bráðalúngnabólgu, stífkrampa, matareitrun, hlaupabólu, hantavírusinn, sinnepsgaseitrun, rauðu hundana, hettusótt, kransæðakrampa, garnaflækju, grænar bólur og jójóæði. Ég er semsagt veikur. En það hefur ekki aftrað mér í að mæta í vinnuna og veikjast enn frekar. Ég mundi rúlla þarna inn í tveimur járnlúngum ef þeir myndu byggja ramp upp tröpppurnar svo aðstoðarmennirnir mínir geti ýtt mér upp. Kanski að yfirburða viðburðarríkir undanfarnir dagar hafi ýtt mér yfir strikið og steypt mér í snörl, tár, hósta og veikindasvita. Sambandsslit, drama, sjálfs-efi, álag, streita, rómantík og svefnleysi. Er ónæmiskerfið ekki alltaf svo viðkvæmt fyrir svona löguðu? Ég fer reglulega í naflaskoðun. Ekki vill maður fá naflamein er það?

Jæja, gleymum þessu og förum að stalkera seleba.

Ég er soldill selebaslúðursfíkill, en þetta veffyrirbæri er ögn of mikið af því góða. Hér eru up-to-the-minute fregnir hvar selebar eru staddir einmitt þessa stundina. Svo er kort meðfylgjandi svo að þeir sem vilja eiginhandaráritun eða skera nefið af Max Weinberg vita nákvæmlega hvert þeir eiga að fara.

Gawker Stalker

mánudagur, apríl 03, 2006

Mánudagslag #13

laugardagur, apríl 01, 2006

Ég er hættur að blogga.

Ég er kominn með nóg af þessu kjaftæði. Það eru bara kellingar og pakk með athygisbrest og -sýki sem nennir að sóa lífi sínu í að halda úti ógeði sem enginn nennir að lesa. Að skrifa með fitugum puttum (franskar í matinn) í myrkrinu með sekk af blandípoka sér við hlið gildir ekki lengur um mig. Þetter búið. Ég ætla að leyfa blogginu að standa til miðnættis í kvöld og svo deleta ég accountinum hjá Blogger. Hnuss.

Ég ætla að halda upp á að vera laus undan bloggdjöflinum og mun því gefa bjór á Sirkus í allt kvöld. Mættu snemma og segðu leyniorðið við barþjóninn: "Skíttíðig, kunta!" og þá færðu bjórinn þinn. Bara einn á mann.

Ég kveð ykkur aulana með þessu, besta lagi sem ég hef heyrt um ævina:

Ótrúlega flott lag mp3