Afmælisgestur 2

Ballaðan er eins árs!
Af því tilefni fékk ég nokkra sem ég les
reglulega til að koma með eina gestafærslu.
Þetta er: Beta


ballaðan hans bobby á afmæli. mér þykir vænt um bobby. ég á afmæli eftir 65 daga. ég hef aldrei haldið upp á afmæli bloggsins míns. það verður fimm ára í desember. eins og ég er egósentrísk og finnst gaman að eiga afmæli er skrýtið að ég hafi aldrei haldið upp á bloggafmæli. kannski því mér finnst bloggið mitt ekkert spes. en mér finnst ég spes. mamma segir oft að ég sé spes en stundum efast ég um að það sé hrós. sumir eru spes og aðrir eru spes. það er munur. svona stjánastuðspes vs. björk sem...nei það er eins. svona stjánastuðspes vs. bobby spes. já bobby er spes. gott spes. og ballaðan er spes. þess vegna er haldið upp á afmælið hennar.

mér finnst gaman að eiga afmæli. þegar ég var tíu ára hélt ég að það væri stórafmæli. þá var ég vont spes og leyfði engum að fá köku fyrr en brennda heimatilbúna oddhvassa pítsan sem mamma bjó til væri búin. maður á að klára matinn áður en maður fær desert. ég henti foreldrum mínum út því ég átti stórafmæli og svo þegar mamma kom heim fann hún fjórar tertur inní matarbúri því krakkarnir kláruðu ekki pítsuna. trúi ekki enn hve ógeðslega skver ég var. held ég hafi næstum alltaf haldið upp á afmælið mitt. ég hef fjórum sinnum drepist í afmælinu mínu. minnir mig. þrisvar haldið það á júróvisjónkvöldi. einu sinni endað í bikiníi með heyrnartól að syngja hástöfum fyrir gesti. einu sinni endað á sviði á nasa dansandi við ruslönu. einu sinni drepist tvisvar. en alltaf hefur verið sjúklega gaman.

í fjölskyldunni minni er hefð fyrir því að afmælisbarnið er vakið með afmælissöng. yfirleitt er sungið illa og allskonar hljóðfæri notuð. trompetar, klarínett, trommur, ryksugur og allt sem býr til læti. ef afmælisbarnið fær ekki fyrir hjartað þá feikar það það. nema einu sinni þegar mamma átti afmæli og við vorum bara tvær því hinir í útlöndum. þá var ég hrædd um að drepana og söng lágt. svo er búið til súkkulaði og afmælisbarnið fær risastóran bolla, svona bolla sem tekur líter og öllum pökkunum er dreift á morgunverðaborðið. þá þarf afmælisbarnið ekki að bíða og vona að það fái gjafir. það byrjar daginn á að fá þær. það er góð byrjun á deginum.

í ár ætla ég ekki að halda upp á afmælið mitt eins og venjulega heldur fljúga klukkan sjö um morguninn til aþenu. það er eftir 65 daga. afmælisveislan mín verður í tíu daga og endar í júróvisjónpartýi aldarinnar. afmæli er gott.

til hamingju með afmælið ballaðan hans bobby. ég syng inní mér til heiðurs þér í allan dag.

betan