Ég fæ mína umbun í reiðufé, takk

Af hverju gefur Séð & Heyrt ekki út bók: GÓÐÆRIÐ þar sem allar þeirra blaðsíður um peningatímana eru endurprentaðar í sinni upprunalegu mynd?

Enginn fjölmiðill fjallaði um þetta pakk með eins barnslegri aðdáun. Þetta yrði stórkostleg heimild um þessa tíma.

Gjafmæli

Hujj en gaman að vera orðinn tuttugosjöára. Ég hef þá út árið til að verða frægur og að drepa mig með of stórum skammti af hlynsírópi eða að fá flensu í heitapott (flökkusagan segir að maður deyji ef maður fer í heitapott með flensu sko). Nei djók ég vildi ekki vilja deyja í einhverjum stjörnuljóma. Ég vildi miklu frekar feika dauða minn einsog allar þessar stjörnur eiga að hafa gert og skilja svo eftir glúrnar vísbendingar um að ég sé á lífi.

Jónína vakti mig með morgunmat í rúmið: brauð með osti & pestó og möffin með kerti oná. Alltaf jafn ferskt að vakna og vera farinn að háma í sig karamellumöffin áður en augun hafa náð að jafna sig af birtunni.

Jóní finnst gaman að gefa margar litlar gjafir frekar en eina stóra og er ég bara fylgjandi því. Ég óx nefnilega aldrei uppúr því að trúa að magn sé ofar gæðum hvað gjafir varðar. Ein gjöfin var frábær rauður gullgrafara-nærfata-samfestingur einsog mig hefur alltaf langað í. Ég get ekki beðið eftir að dansa gullgrafaradans í honum í sveitinni, með bakpoka með pönnu dinglandi í. "Gold! Gooollld!"

Og hey takk fyrir öll heillaskeytin á Facebook. Ég bókstaflega grét af gleði við að lesa hvert og einasta þeirra. Án djóks: Hágrét.

Hrísgrjón

Gríshjón

Ég tönnlast á Mad Men þangað til þú horfir.

Gúlp. Ég hef í fórum mínum seinasta þáttinn af seríu 2.

En hvað svo? Hvað á ég að horfa á þangað til season 3 byrjar? Uppástungur? Eru aðrir Mad Men aðdáendur (eða "Maddicts"einsog þeir eru kallaðir) í húsinu?


Hér er Hildy. Hún átti góða seríu, sérstaklega
þegar hún var full í vinnuteitinni hans Harry.

Letilegur Laugardagur

OK

Ég er kominn á Facebook.

Ef ég ætla að vera með samskiptavef sem ég logga mig inná á mánaðarfresti til að fylgjast með vinum mínum, þá má það frekar vera FB en Myspace.

Farewell Myspace, it's been real. En þú og þessi gaur megið bara taka því rólega.

Endurspeglun

Hahaha:



Kæru fótósjopparar: ekki láta smáatriði einsog ANNAÐ EINTAK af andlitinu fara framhjá ykkur.

Fundið á hinu æðislega Photoshop Disasters.

Hananú

Jæja. Ég var rétt í þessu að þurrka út mbl.is og aðra innlenda frétta- og umræðuvefi úr RSSinu mínu.

Enda AAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAALLLLLLLLLLLLLLLLLLLLVEG nóg komið af þessu ógeðis eilífðar krepputuði.

Kaupmáttur

Jæja, hin nýja og geggjaða plata Lovísu er komin í verslanir:



Hlaupið, ekki gangið, í næsta músíkmarkað og festið kaup á dýrðinni.

PS-
Hey wá en flott kápa.

Sorp

Ég fékk ansi athyglisvert spamm-komment á eina færsluna á B-town í gær. Þetta er þannig spamm að róbótinn dælir út milljónum af leitarorðum hingað og þangað og vonast til að einhver grunlaus slái það inn á Google, smelli á "Stain removal" í kommentinu og fái þá ómótstæðilegt tilboð um stinningarlyfspýramídasvindl.

Engu að síður, eru þessar runur af leitarorðs-linkum einkar ljóðrænir þannig séð:

"Black mold exposureblack mold symptoms of exposurewrought iron garden gatesiron garden gates find them herefine thin hair hairstylessearch hair styles for fine thin hairnight vision binocularsbuy night vision binocularslipitor reactionslipitor allergic reactionsluxury beach resort in the philippines"

I dig man, I dig. Atómljóð slam-poetry bara. Hér er annað mergjað vers:

"hoof prints antique equestrian printsantique hoof prints equestrian printsBuy air bedadjustablebuy the best adjustable air bedsair beds canadian storesCanadian stores for air beds"

Flott lýrík maður. Stofnum band. En hér er auðvitað uppáhalds erindið mitt:

"bob hairstylebob haircutsbob layeredpob hairstylebobbedclassic bobCare for Curly HairTips for Curly Haircurly hair12r 22.5 best pricetires truck bustires 12r 22.5"

Ég ætti að stofna sjampóverksmiðju sem heitir "Bobcare for curly hairtips".

Oj

Myndir og frásagnir af snekkjunni þeirra Hagbaugshjóna hefur farið fyrir brjóstið á mörgum. Sláist í hópinn með því að skoða hér. Varúð - linkur á þessari síðu vísar beint í pdf dánlód, bara svo þið vitið.

Mér er nokk sama um trylltar velmegunarinnréttingarnar í þessum kláf (sem eru reyndar, OK, ofboðslega ósmekklegar) en ég bara verð að adressa þetta:



Hvaðaa..? Spegill í fokking loftinu? Er 1974 hjá ykkur eða? Ætliði að hafa makaskipta swing partý og fondú í eftirrétt? Er þetta svo þið getið horft á hvort annað kippa í möllettinn? Og að gera eitthvað í "the no-no hole"?

Brr. Sko sóun á þvegnu blóðfé er smámál. ÞETTA er hinn sanni glæpur.

hm

Hvað er kvenkyns orðið yfir flugdólg? Flugdylgja?

Loksins

úff eftir svo mörg ár af því að hafa hálfkætingslega spáð í hvað "WC" á salernum stendur fyrir, komst ég loksins að því fyrir tilviljun.

Water Closet mun það vera.

Nú get ég andað léttar og sofið rótt.

Skrípó

Ég bjó til kort af Íslandi fyrir þá sem róa þjóðarskútunni blint í ólgusjó og stefna í strand á flæðiskeri með gat í bankabuxunum.


Klikk fyrir stærra.

Landvættirnar Jóní og Petra brugðu sér í hafmeyjulíki og gæta landsins með kjafti og sporði.

Nefni

Ég sá það í DV í dag að í ár samþykkti Mannanafnanefnd drengsnafnið Merkúr.

??

Hvað með Satúrnus? Andromeda? Betelgause? Keuper-Beltið?

Kreppulaus færsla

Er ég einn um það að vera pínu hræddur við að skipta um ljósaperu? Auðvitað kippi ég mér ekkert upp við að gera það, en þegar maður er að skrúfa bíður maður eftir að ljósið komi skyndilega á, einsog maður bíður eftir bregðuatriði í bíómynd.

Svo hjálpar ekki ef peran sem maður er að skipta um sprakk. Þá bíður maður bara eftir því að nýja springi líka og taki puttana með. það gæti gerst!!

Annað harmlaust sem ég er með smávægilegan, barnalegan ótta við:

Þvottavélar á fullum snúning. Voðalegur hamagangur og hávaði er í þessu. Búhú. Þess vegna voru fundin upp þvottahús, fólk þorði ekki að vera með þetta nálægt sér.

Hvínandi rok sem lætur rúðurnar titra. Þegar ég var lítill hélt ég að rúðan myndi brotna og soga mig út.


-Bjölli Kveif.

OKEY!! Djísös!

DJÖÖÖHÖHÖHÖFULL er ég orðinn full-pakk-troð-saddur af þessari linnulausu efnahagsumræðu. Bara wá. Nóg komið. Hver einasta frétt í fréttatímum beggja stöðva er um kreppu, volæði og hrakspár. Þeir eru einsog Rain Man, alltaf að tönnlast á sama hlutnum. Við þurfum Tom Cruise til að kippa þessu í lag með Vísindakirkjumessu.

Svona voru fréttirnar á Stöð 2 í gær:

"Krónan aldrei verið lægri. Ráðamenn vilja taka upp ítalska Líru"

"Ástandið mun BÓKAÐ MÁL versna og við munum öll lifa í pappakössum og borða glerbrot og rottukjét fyrir áramót, segja sérfræðingar samróma"

Svo koma fimm fréttir í röð um hvernig erlendir fjölmiðlar fjalla um skrípaleikinn hérna. Það er fátt sem kitlar hégóma okkar einsog erlend umfjöllun um Ísland, þótt hún sé um klúður og kreppu.

"Seðlabankastjóri fullyrðir í fréttatilkynningu að Baugsmenn séu með rassafýlu og að þeir séu alltaf að kyssast og eru alltaf að pissa í sig. Liggaliggalá"

Svo koma íþróttafréttirnar: "Íþróttalið eiga ekki lengur efni á sápu né takkaskóm - munu nú spila með stráfylltum geitarmaga. Öll von er úti góðir íslendingar, KSÍ hvetur íslendinga til að fjölmenna á fjöldasjálfsmorð í Höllinni annað kvöld"

Þetta er bara svo óskaplega þreytt að ég nenni ekki einu sinni að gera grín að þessu. Við Jóní skelltum okkur bara til Þingvalla í gær til að sleppa við rövlið. Þar hefðu menn nú verið höggnir og étnir fyrir svona gengdarlaust væl.