POW!skar

Maður er svo mikill bölvaður göltur þegar maður étur yfir sig af súkkulaði. Páskaegg eru mjög góð hugmynd á pappír, en í munni... ekki svo mikið. Mannverunni var bara ekki ætlað að kjamsa á kíló af mjólkursúkkulaði og súru gúmmí. Mér verður flökurt og fæ sykursjokk við tilhugsunina. Svo liggja leifarnar í skál fram eftir sumri þangað til maður loksins bryður brjóstsykurinn og lepur upp mylsnuna. Ég bað mömmu um að sleppa því að gefa mér egg. Hún gaf mér bjór í staðinn, sem er auðvitað frábær lausn. Þannig að ég byrjaði páskadagsmorgun með því að opna einn ískaldan uppí rúmi. Djók.

Kannski er vandamálið að páskaegg eru of simpíl. Mér finnst ekkert gott að japla á hreinu súkkulaði. Hvað með að hafa tvöfalt lag af súkkulaði og þunna himnu af marsipan á milli? Eða -enn betri hugmynd- að gera íspáskaegg! Súkkulaðiegg að utan, en bragðarefur að innan! Nói, ég þigg mína umbun í reiðufé.

OK þetta er ekki alveg eggjalaus dagur. Ég kom við í 1011 og keypti tvö Kinderegg fyrir okkur Jóní að fela. Það var svona lítill klessubíll í mínu. Þegar hann rekst á eitthvað, þá hendist litli bílstjórinn úr sætinu. Hörmuleg bílslys hafa aldrei verið eins krúttileg!


PS-
Sko! Kinder fatta þetta. Brúnt og hvítt súkkulaði hlið við hlið! Gjebbó.